Peumuda Aceh
Oleh: Tisma
Peumuda Aceh bèk le lam teungeut
Beudoh neujak beut deungon sikula
Digob laen ka dumpeu habeh jeut
Bèk roh gob peungeut seulama-lama
Beudoh peumuda inong ngon agam
Asah pikeran masa yoh muda
Bak na iéleumè meujeunèh macam
Kareuna sinan punca bahgia.
Bèk sabe galak rumoh binteh bleut
Beuna tameuheut keu rumoh kaca
Beudoh meurunoë sikula ngon buet
Bak meunan meuheut bagi peumuda
Peumuda Aceh dilè dumpeu jeut
Hana soe pungeut sampoë teunama
Pakon uroe nyoe ka tinggai neubeut
Ka habeh teungeut agam ngon dara
Nanggroë Aceh makmu bukon le
Geupula pade deungon bak lada
Geutah deungon u dama dalam glee
Keu peue le hase iéleumè hana
Wahe syedara inong ngon agam
Beudoh tidoran ka jeuet meujaga
Akai beu lisek beu ek jeuet tapham
Punca disinan seunang keu gata.
Aneuk Dara
Oleh: Tisma
Aneuek dara wajeeb jaga droé
Bék that wen woe bak rét raya
Hoe2 tajak bék rooh sidroe
Hana gét bagoé nyang meunan rupa
Aneuk dara payah that papah
Silap nangbah kayeem binasa
Yooh goh meukaween droë tapapah
Malé sileupah meungnyoe binasa
Keubeue saboh weue mangat that papah
Keubit that susah jaga sidara
Gata hee siti geunaseeh nangbah
Manyak geupapah sampoë déwasa
Oleeh seubab nyan beuna taingat
Wasit amanat bék nameutuka
Supaya jioh segala laknat
Nyang leubéh that meudroë tadjaga
Gob peuingat goh teunté ubah
Oh jiteugah kabeungeeh gata
Tapubut surooh peujiooh teugah
Neutuloong di Allah gata hai dara
Aneuk dara mubé sileupah
Seu ulah2 bungoeng jroh rupa
Oleeh seubab nyan bunda meutuah
Beugét neupapah aneuek nyang dara.
Sumber: LaguLagu dari Orkes Djeumpa Atjeh Djilid I Cetakan II, diterbitkan oleh H. Razali Djuned, pegawai Kantor Urusan Agama Kotamadya Banda Atjeh. Dicetak oleh Pertjetakan Negara, Banda Atjeh, 1967. Dikutip portalsatu.com dari acehbooks.org.