Aneuk Jampok
Deungoe lón kisah khabaran zameun
Masa kerajèun Saidil Ambia
Masa kerajèun Nabi Sulaiman
Yang mat hukuman ban sigom donya
Nibak siuroe nabi jak meuen
Deungon angen sajan seureuta
Nabi neuduek ateuh kerusi
Angén bapotlé ban siklep mata
Oh ban saré troh bak saboh teumpat
Neupiyóh siat neugantoe raja
Nabi tanyong nibak dum cicem
Toh siri katem lon boh keu raja
Seu-ot jampok tuanku ampon
Nyoepat aneuk lón nebóh keu raja
Sebab aneuk lón rupa ceudah that
Lagi ngon hibat lé bulé mata
Mata bulat babah meukawet
Cit geut that sabet menyoë jih raja
Nabi Sulaiman teusingéh teu khem
Dum cicem laën jikhem meubura
Malé geuthat-that di tgk. jampok
Teuduk-duk teusepók mubleuk-bleuk mata
Jampok ka malé teutap ji-im droë
Sampoëan jinoë sabé jipeukra
Teuma teuka beurujuk balé
Han kutem diké jampók keu raja
Teuma lom teuka poé cicem müróng
Jigróp-róp lambong jicoh lam mata
Teuma lom meusu poé cicem tiong
Han ako dilón meujih keu raja
Seudang beuragoe yang leubeh tari
Kupiah haji ngon taupi waja
Teuma jimeusu cicem keutók-tók
Meuhanjeut jampok bah lon keu raja
Karena bak lón lé that piasan
Lón péh canang prang oh malam jula
Teuma seuót cicem raja ngang
Jaroë dijulang ateuh jeumala
Ampon Tüanku meribé ampon
Galak that dilón gop nyan keu raja
Karena gop nyan lé that mainan
Geupeh canang prang oh malam jula
Geureuduk tampi yang péh canang prang
Tadeungoe kjam ban saboh dónya
Teuma jimeusu tók-tók beragoë
Hana meusoè-soè taboh keu raja
Sedangkan dilón kupiah beusoe
Hana si uroë lakè keu raja
Teuma jidaméi oleh keulidi
Sirajawali tabóh keu raja
Tok-tok beuragoe tabóh keuwaki
Tabóh keurani poë cicem pala
Lheuek bangguna tabóh bupati
Simirahpati jeut keuwedana
Kleung puteh ulee jeuet kepolisi
Kepala nanggri aneuek ngang dama
Tabóh kehakim cicem paikoe
Poé aneuk tuló hakim agama
Kepenerangan poé cicem subang
Aneuk cakeuk blang kepala tentera
Cicem peureuleng ke keuchik gampong
Cicem semantong keu ureung runda
Poé teuteut pangeu jeut ke pubantu
Cicem mirahrueng guru sikula
Kisah poe jampok lon piyoh siat
Jinoe lón sambat ke cicem paya
Cicem beuruak jeut keu mak bidan
Seubab digop nyan geukuwaa-kuwa.[]
Sumber: LaguLagu dari Orkes Djeumpa Atjeh Djilid I Cetakan II, diterbitkan oleh H. Razali Djuned, pegawai Kantor Urusan Agama Kotamadya Banda Atjeh. Dicetak oleh Pertjetakan Negara, Banda Atjeh, 1967. Dikutip portalsatu.com dari acehbooks.org.