Bajé Yukensi
Oleh: A. Junus
Bajé yukensi keubit that indah
Bajé peuleumah boh peuték dua
Aneuk nyang dara arok sileupah
Yukensi meugah harok di mata
Yukensi bajé yukensi
Bajé meunari ureung ie rupa (eropa)
Nibak geutanyoe keubajé tari
Ulé ili nibak rét raya
Yukensi kon bajé indah
Bajé geuteugah dalam agama
Kon kamoë benci cuma meupeugah
Supaya bèk salah gata hai dara
Yukensi bajé hareum that
Soé-soé nyang lihat kazina mata
Ureung inong hanjeut deuh aurat
Takeubah leugat bék lé meuhawa
Ureung ie rupa ka meunan adat
Jeub-jeub aurat leumah ulua
Nyangka meunan kon umat Muhammad
Beuna taingat wahé nyak dara
Geutanyoe Aceh hanjeut lagé nyan
Bék turot-turotan ureung dilua
Beuna tagaseh bék gop ceulaan
Ingat hai intan nak juet bahgia.
Siluweu Jeungki
Oleh: Di Husen
Siluweu jeungki deungo lon kisah
Gura sileupah takalon rupa
Meupha jih sulu ngon ubit leupah
Sampoe meu-ulah boh puggong raya
Siluweu jeungki ija cit lheuhah
Yum pih murah 'oh tabloe ija
Peumuda jinoe lé that kacidah
Peu-peu nyang leumah ditiré sigra
Geutanyoe kalón malé sileupah
Gadoh meuruah bak aneuk muda
Bangsa gob dingui mupeu paédah
'Oh uroe mirah jak paroh guda
Tangui pakaian cit hana salah
Mupat daerah meukri ban rupa
Kuboo Amerika keubit nyo meugah
Siluweu gagah ngon pasang guda
Wahé peumuda adoe meutuwah
Hana paédah nyang meunan rupa
Pakaian biasa mantong cit gagah
Beuthat gobpeugah ka model lama
Sampoe keu 'ohnoe kisah lon peugah
Meunyoe nasalah meu'ah beuraya
Peu-peu meukalon nyang ka meusalah
Patot meupeugah ubé sikada.[]
Sumber: LaguLagu dari Orkes Djeumpa Atjeh Djilid I Cetakan II, diterbitkan oleh H. Razali Djuned, pegawai Kantor Urusan Agama Kotamadya Banda Atjeh. Dicetak oleh Pertjetakan Negara, Banda Atjeh, 1967. Dikutip portalsatu.com dari acehbooks.org.